馮諾嘉手記：喜勁飛露底牌

聪明的白痴

　　今日沙田十場賽事，重頭戲當然係第八場本地一級賽香港經典一哩賽，跑完呢場之後，下個月仲有場打吡預賽，然後就到三月嘅打吡正本戲嘞！

　　心水場次先講1600米嘅經典一哩賽，參戰馬之中好多近績都相當好，但比較之下，「締造美麗」同「喜勁飛」就最突出，皆因佢哋都係連場有好表現，前駒在港三連勝後再出獲亞軍，但最近又連捷；後駒自上季初出熱身跑第五之後，跟住跨季四連霸。論評分，「締造美麗」高過「喜勁飛」成27分，睇落實力較強，加上係平磅賽，後駒評分低冇着數，但係前駒至今仲未跑過1600米，成為疑點，不過練者放棄愛徒蔡明紹而強配蘇銘倫，就知佢嘅決心，但係小妹反而想睇吓「喜勁飛」嘅潛力，「締造美麗」上場跑一班賽實力略見一二，「喜勁飛」上場仲係跑緊三班賽，實力未見底，加上佢次次末段都能交出快時間，兩匹馬今場都排外檔，後上嘅「喜勁飛」當然有着數，前段消耗較少氣力，所以今場用「喜勁飛」做膽。

　　配腳首選「締造美麗」，再拖佢嘅同主馬「美麗傳奇」，來港兩戰不勝有位，上仗同程贏得輕鬆，新勝猶勇要揀。「金獅威將」喺香港三戰全上名，但搵韋達跑大賽，咪怪小妹對佢有多少成見，只係作配。

越跑越有增程啱發揮

　　第四場四班1400米，馬膽「越跑越有」，呢匹馬上場初出跑對佢嚟講較短嘅田草1200米，以個幾馬位屈居第二，走勢已算唔錯，呢場增程跑1400米相信更合發揮，隨時可以贏馬開齋。配腳方面，「傑出君子」1400米正宗，「馬皇帝」同「魅力心」上仗都後上甚勁，都有力一爭。

　　第六場三班1200米，「傾力之城」今季兩戰同程獲冠亞各一，狀態大勇，評分仲有大把上升空間，賽前專登替試咗課大閘，一放到底走勢吸引，今場繼續負輕磅有利，操足而臨可作膽。「滙名燈」至今跑咗三場，獲兩冠一季，同樣係有一定質素嘅質新馬，今場搵柏寶壓陣，配腳首選。「馬之王」嚟香港三戰全部入位，仲未開齋有關人等鬥志一定強，要拖。「高手」上場大熱僅敗只跑第二，今場有一檔之利，形勢幾好，亦可兼顧。