韋達攻勢誇啦啦 捧「串燒三兄弟」

聪明的白痴

　　雖然啱啱那次谷戰韋達起個孖，其實再對上一次佢在谷草單日贏多過一W，已是上年11月尾。若果睇番近期個trend，正如同文阿賢早前所指：韋達就田草，谷草捧柏寶！有時攤路未爆之前，根本無謂拗頸，係咁意睇番對上幾次沙田賽期，韋達好似唔起孖都瞓唔着，贏三 、四場亦閒過立秋，姑勿論嗰啲賽期之中，韋達頭馬數字係咪達到大家嘅預期，總之呢種嘭嘭聲嘅攻勢已經維持咗一個月有多（19/12 連中三元開始）。

陽明德得退出兵力仍強

　　至於呢期佢雖然退出咗隻餐士馬「陽明德得」，手上嘅兵力依然夠照，由「上半場」開始數起，甚麼「齊鼓掌」、「強中傲」、「越跑越有」、「國寶」、「勇敢小子」等等，都唔好計經典一哩嘅「金獅威將」（驚佢向來冇大賽命），又或是「嘉寶神駒」、「高手」嘞，所以呢日應該繼續係韋家天下吧！

　　「齊鼓掌」和「強中傲」新簇簇，但前駒初出已露過一手，早段走規犯錯唔少，直路又畀對手壓迫，一樣衝得幾「行」，睇嚟四班過客一名，韋達忽然擸嚟騎，飛數對辦，趁仲有啲賠率，博第一W呢鋪或會係最好分。後駒隔夜冇乜飛，個心冷一截，但諗深一層，呢匹馬同廐侶「美猴王」同一買手，冇理由一隻直落三W，佢會係豬頭骨啩！？博P無不可。

　　至於「越跑越有」、「國寶」、「勇敢小子」呢三隻串燒三兄弟，唔買「扣」都唔得，兩隻廿幾蚊，一隻四倍，要串埋贏晒先至炒埋有一碟，但講到能力就比較令人有信心，「越跑越有」一出即有Q，其餘嗰兩隻就贏開嚟，冇咩唔好，係熱啲啫。數吓一隻，數吓又一隻，唔怪得韋達騎師王隔得十幾皮，都係嗰句囉，冇咩唔好，係熱啲啫！

亨利