等足58年最感人威爾斯唔輸就掂

猪拉多纳

威爾斯自1958年世盃後就冇再躋身國際大賽決賽周，依家「大聖爺」加里夫巴利打救威爾斯，協助球隊一圓半世紀大賽夢。究竟呢個偉大故事會唔會成真，就要睇今晚威爾斯作客波斯尼亞能唔能夠搶分成功！威爾斯除咗靠「大聖爺」外，仲有就係8戰僅失2球嘅超強防守，今場一於捧威爾斯保不敗圓夢！

（有線64及203台周日凌晨2時45分直播）

威爾斯依家喺歐國外B組以18分排榜首，球隊只要喺今場作客波斯尼亞及主場對安道爾最後兩輪賽事拎多1分，就可以完成歷史任務，史上首次殺入歐國盃決賽周，同埋58年後再次喺大型賽事決賽周露面！
巴利復出更利反擊

威爾斯喺歐國外8戰只係失咗2球，就知道呢隊波防守有幾咁集中，連比利時兩戰佢哋都一球不入，波斯尼亞都幾難入到佢哋波，何況加里夫巴利今場趕及落場，多咗呢位飛人，對擅打突擊嘅威爾斯嚟講如虎添翼。波斯尼亞喺組內以11分排緊第4，為搶分出線今場唔攻唔得，連有傷在身嘅前鋒迪斯高同後防魯歷都可能會紮住上陣。但威爾斯有番高速「大聖爺」在陣，波斯尼亞隨時輸埋唔奇。威爾斯上下一心，今場受讓半一，下盤值捧！