洪禮賢講馬：齊鼓掌夠膽識

聪明的白痴

　　韋達一而再在沙田賽事每期贏三兩場，以佢今日九匹坐騎的能力，又一堆叫胡三飛嘅馬，睇嚟又係起碼坐住三場。此外，勞愛德亦有部分邊線馬幾抵博，例如「卓越精英」等等，不妨吼吓。

重心場次

第6場  第三班（80-60分）1200米

　　傾力之城只曾在一場變化地跑得唔好，像上場初升三班一樣有Ｑ，按末段「多多寶馬」都唔係咁易過到佢，的確係幾韌﹔今場五檔而本身快閘，要攞欄唔難，膽材。

　    「滙名燈」直落三場冇Ｗ有Ｐ，尤其上場初升班、十四檔加埋轉場，證明兩Ｗ後不用時間去消化，呢次檔好估計更惡。一對冤家「馬之王」和「高手」又同場，由於彼此俱重磅，爭腳居多。「十則圍之」除非加罩曉飛，若不，始終之前兩場太失望。「好新聞」會係最睇唔透，陣上唔只一次追得好，而上場前中段穩定唔到，拉士仍追得好，縮落1200米，早段可能唔使留得咁辛苦，或有助發揮。

    　「瀟洒良駒」隔夜一度有啲飛。「再來風」差兩分落班，斷唔會衝動﹗﹖落番班屆時想點都得。

第1場  第五班（40-15分）1600米

　　卓越精英嘗試轉配件或帶來衝擊，總覺季內兩場唔係跑得曳（一次楔內欄，一次外斜），何況轉番此程仲啱性能，十幾廿倍抵博。「威威」及「開心財星」可取係往績上有揸拿。

　    「恒運財星」放唔出便「窩河」，估計以佢嘅前速，就算二叠唔難泊位，放得順或有Ｐ。

　    「嘉寶神駒」唔叻，轉場只限作配。「東海先鋒」仍未進入穩定期。

第2場  第四班（60-40分）1200米

　　齊鼓掌初出早段既內閃又留到口擘擘，直路亦被對手向內斜跑影響衝程，仍然有膽識肯湧，看來此駒內在鬥心唔差，如開氣後稍有進展，已具出頭機會。

　    「千笑」情況似前駒，首仗唔覺走規及際遇好得去邊，一樣於末段肯，或許手上亦有唔少虛分，唯一擔心係愈跑愈跌磅。

　    「熱錢」係驚初出大外檔，未知應唔應付到，計進度差唔多了。「麗晶之星」和「香檳王」前速可靠，排位好易掌握形勢。

　    「覓得寶」上仗放得唔錯，但唔知今次梁家偉發揮成點。「精英財星」一檔驚直路難取位。

第3場  第四班（60-40分）1000米

　　勁勇士上賽前已講過，如再冇表現應分手，最終佢以唔錯時間入Ｑ（頭馬締速係季內7場四班此程第二快），賽績具指標性。「風動寶」剛勝唔覺犀利，一來，走規唔多順，二來締速普通（今季19場直路賽最慢），且看加分後能否繼續好。

　    「電子金麟」白養好耐，係唔得或狀態甩皮甩骨，根本唔使急，隨時初出劏晒。「太極至尊」上場那席位置唔夠說服力。「星光活力」好快就有谷草1000米，其實唔使心急轉場，講到此程則應付到，冷門Ｔ腳。

第4場  第四班（60-40分）1400米

　　越跑越有初出有揀，冇理由好開唔再揀。「確叻星」落班才郁手，所以唔使介意上場跑成點﹗「傑出君子」仍然係生，但現階段縮回此程好啲。「馬皇帝」初出已有走勢，加程及轉回草地，用意好。「天之驕子」40分係都唔落班，寧負輕磅，反映今場唔慌冇拼意。「旅遊大亨」唔係驚之前準備有阻窒，今場必會加入考慮，既然有賠率，買ＱＴ建議預佢一注，費事走寶。

第5場  第四班（60-40分）1600米

　　喜綵啱啱嗰場輸少少返嚟係唔抵，但頭馬再出在三班也得殿軍，水準有眼見，值得追。「國寶」落腳慢，1400米都差啲追唔切，加長200米仲好。

    　「陸豐福星」加頭罩如改善到陣上岳頭和側頭的毛病，唔排除有威脅。「勁快」再跑長啲未必有把握，始終上場好好勢之下仍鬥輸。「壽比南山」唔落班但轉到此程（頭場五班唔報），有賠率，拖埋呢次。

第7場  第一班（115-90分）1400米

　　新力勁具級際賽上名能力，來到此班賺卡士。「好日子」柏威廉有膽識可於剛仗剷到上嚟，唔代表韋達都得，過熱更唔值博。「魔法幻影」據知好貴，外地賽績唔失禮，大摩或想埋Ｑ。

　　「鐵拳」耐冇跑，但向來不怕久休，有新鮮感此程冇問題。「魄力寶」係驚級數勉強，希望輕磅幫到手。

第8場  一級賽 1600米

　　締造美麗分利贏級數（對上六屆①號馬全入前四名），此程性能和十四檔的影響要估，但終究也是難得的好馬…不要怕，只要信﹗「喜勁飛」人人都知虛分多，之前場場都唔想贏得咁遠，既然跳來級際賽，層次去到邊，會有答案了。「金獅威將」彈彈吓及閃嚟閃去的問題仍於上場見到，顯示出尚有好大可塑性，加罩排內檔會幫到，係驚韋達點發揮。「美麗傳奇」與「白玉駿駒」夠牙力，路程又唔使懷疑，邊線腳。

第9場  第三班（75-55分）1400米

　　歡呼星好開，潛能冇咁快睇晒，濶場唔覺應付不來。「傳奇快車」上場際遇差劣都幾乎有Ｐ，三班根本冇有怕。「雅雪」養回健康，分數在6字頭點會有阻力﹔「馬主精英」亦然。

　    「好芝味」長期分利、「中國陸家」1400米有根據，俱可考慮。「羅馬奔騰」上場閃閃身輸近，小心﹗

第10場  第二班（95-75）1400米

　　勇敢小子一馬獨大的形勢，升到二班亦無懼。「永勝多」路程專家，正路腳。「非我莫屬」有得追的場合，隨時爆到上嚟。

　    「賀喜」表面條件唔好，但跑落可能另一回事，大冷可諗諗。「紅跑車」上場跑法「踩鋼線」，呢次唔敢試水住﹗﹖「勝利旋峰」此程性能ok、檔好，加上磅輕，或提高競爭力。