羅拔仔入波保證「波蘭大」人人愛

猪拉多纳

歐盃外D組生死戰，波蘭主場對愛爾蘭，呢兩隊仲有機會爭直接出線權，形勢非常緊湊。雙方現時同分，波蘭首循環作客打和愛爾蘭1比1，有1粒作客入球優勢，今場只要打和0比0或1比1仍可出線。不過，波蘭始終有地利，尤其是射手羅拔利雲度夫斯基腳風順到冇朋友，應會發揮進攻強項，以求KO對手。愛爾蘭背水一戰冇退路亦會焗攻爭勝，捧入球大啱數。

（有線64及203台周一凌晨2時45分直播）

波蘭日前靠羅拔利雲度夫斯基梅開二度，驚險逼和蘇格蘭2比2，其實該仗波蘭開波3分鐘已打開紀錄，之後有所鬆懈，令對手有機可乘，吸取教訓之後，今仗料會速戰速決，爭取入多幾粒「保險球」，令愛爾蘭冇得翻身。波蘭擁有羅拔利雲度夫斯基在陣，入波有保證，呢位拜仁慕尼黑球星着晒火，包括德甲、歐聯及歐國盃外圍賽，近5次上陣共轟入14球，數字非常誇張，來到最後一場外圍賽，佢更加會搏盡，愛軍防線好難頂得住佢。
愛爾蘭背城借一

愛爾蘭上仗被睇淡下，爆冷以1比0擊敗世界盃冠軍德國，為士氣注下強心針。由於首循環被波蘭取得作客入球，故愛爾蘭今仗一定要入波先至有價講，作客被迫傾向進取。鋒線除名將羅比堅尼外，上仗攻破德國大門嘅沙恩朗亦值得留意，球隊喺首循環就係靠呢位修咸頓射手補時入波逼和波蘭，佢專入救命波，今仗隨時又有佳作，開大機會樂觀。