鹿角撞船贏多次

猪拉多纳

另一場日聯盃4強戰由鹿島鹿角主場對神戶勝利船，首回合作客贏2比1嘅鹿角，只要唔輸波就可以晉級，球隊近況唔錯，面對最近已連輸5場嘅勝利船，相信會以贏波慶祝打入日聯盃決賽，阿謙推介主勝。

（有線64及203台周日下午1時直播）

鹿角首回合憑後衞山村和也同前鋒赤崎秀平各建一功贏波，球隊雖有中場柴崎岳被日本國家隊徵召繼續避戰，射手甸尼爾及中場土居聖真需要養傷唔踢得，另一巴西前鋒達維因為傷愈後狀態低迷而要屈居後備，但球隊表現未受太大影響。鹿角連續兩仗都以全本土球員出戰，但表現反而更理想，今仗主場面對連續第3次交手嘅勝利船，有望再延續上兩仗贏波嘅氣勢，再下一城進身日聯盃決賽。
勝利船5連敗頹爆

勝利船近期表現認真麻麻，近5仗輸晒之餘只係入得兩球但失咗11球，明顯係攻不銳守不穩。勝利船前鋒渡邊千真、小川慶治朗同後衞安田理大雖已康復，前兩者更喺上仗首回合正選上陣，但未能阻止球隊近期嘅頹勢，加上曾踢過鹿角嘅巴西前鋒馬昆奴斯因傷上陣成疑，令近況甚差嘅勝利船形勢更惡劣。今仗係鹿角同勝利船連續第3場對戰，但勝利船上兩仗皆踢到無力招架，今仗作客都係凶多吉少，一於捧主勝。