上場輸波成肚火 德國「格」殺勿

猪拉多纳

今晚歐國盃D組另一場好戲，由德國喺萊比錫恭候格魯吉亞，雙方實力差天共地，但咪以為「日耳曼兵團」咁就會Hea踢，佢哋上仗倒灶輸畀愛爾蘭之後，全隊上下都激氣到爆，今鋪實搵篤定出局嘅格魯吉亞出氣，讓到「-2」照捧1.63倍「讓球主勝」。

（有線62及202周一凌晨2:45直播）

堂堂世界冠軍，德國嚟到最後一輪分組賽仲未攞到直接出線資格梗係樣衰啦，上仗輸畀愛爾蘭之後，中堅曉姆斯嬲到癲，咬牙切齒話要喺今晚場波大開殺戒。查實德國輸畀愛爾蘭場波足足有17次攻門，絕對唔係輕敵同Hea踢，家陣「日耳曼兵團」矢志省招牌，由湯馬士梅拿同馬高列奧斯攻堅，格魯吉亞後防實有得震冇得瞓。
格魯吉亞對賽全敗

今鋪德國和波夠出線，贏波就攞硬首名，如果愛爾蘭喺另邊廂賽和波蘭，而格魯吉亞爆冷贏德國，咁「日耳曼兵團」就要去踢附加賽。不過呢個可能性微乎其微，畢竟格魯吉亞過去4次鬥德國輸晒，上仗大炒直布羅陀4蛋場波，更係佢哋近23場正式比賽嘅唯一作客勝仗，實力去到邊大家心照。況且最好波嗰件中場指揮官贊杜尼亞受傷缺陣，今晚都幾大鑊！