鳳凰舊班底齊心拆紐

猪拉多纳

澳職今日上演首輪聯賽壓軸戲，由威靈頓鳳凰主場迎戰紐卡素噴射機。上季常規賽排第4嘅鳳凰，今季保留大部分主力，默契好夠齊心之外，佢哋更有荷蘭前鋒沙邦來投，絕對係有野心嘅球隊，首仗迎戰重建緊嘅噴射機要拎開門紅，熱捧1.55倍主勝！

鳳凰季前熱身賽表現對辦，上月贏FC悉尼表現唔錯，今場除咗夫添出擊外，兩件養傷多時嘅洛根羅渣臣、薛蒙特傷愈復出，更何況中場有麥堅治擔大旗，戰鬥力夠晒保證。鳳凰近12次主場對噴射機有8勝3和1負壓倒性佳績，唔會咁易甩拖。
紐卡素噴射機大換血

上季做包尾大幡嘅紐卡素噴射機，季前大換血搞到面目全非，新隊長保加特更係「紅牌大王」！呢位29歲守將職業生涯食過6張紅牌，係澳職嘅「冧巴溫」紀錄，搵佢做隊長受到球迷非議，事實上班波都知今年係陪跑居多，輸波當交學費啦！