奧巴美揚跑得快過保特？

猪拉多纳

德甲官方twitter前日發文，稱讚多蒙特前鋒奧巴美揚係地球上跑得最快嘅人，仲快過保特！喺某程度上原來係，twitter發文話奧巴美揚奔跑時速達每小時34.98公里，30米衝刺只需3.7秒，保特都唔夠佢快！

牙買加飛人保特喺09年創下9秒58嘅百米世績，不過前30米需時3.78秒，奧巴美揚前速比佢更快，喺足球場上，10至30米衝刺係最常用，短途爆炸力強係奧巴美揚最大優勢，往往可以喺反擊中單憑速度突破對手整條防線。不過，雖然德甲官方話佢最勁，但最新推出嘅FIFA 16遊戲入面佢嘅速度值只係95，同皇馬嘅加里夫巴利一樣並列第2，而第1位係英超阿仙奴嘅禾確特，數值係96。
引來巴塞垂涎

奧巴美揚今季大爆發，8場聯賽已經轟入10球，難怪巴塞隆拿表明視佢為獵物，不過多蒙特已經閂定後門話堅拒放人，好在奧巴美揚已經公開表示喺多蒙特好開心，並冇離隊打算。