洪禮賢講馬：鋼寶①夫當關

聪明的白痴

　　上期田草韋達失手收場，唔知來到今期會否輪到柏寶突然死火，若果睇番一月三期谷戰賽期，阿寶單日贏三兩場真係易過借火，但望落佢今期嗰六匹馬，又唔似咁標青噃，反而上次失手嘅韋達嗰手馬似樣啲。

重心場次

第5場  第三班（80-60分）1200米

　　鋼寶經常在班內田草場合被打壓，形勢改變不了，反而在谷草會有轉機，正如前仗在此程沿途蝕到暈都幾乎衝入三甲，賽績唔簡單。呢次一檔兼用韋達（今季騎者谷草11匹一檔馬得3冠4亞2殿），預期唔會留得好後，效果可能仲好，或可勝回一仗。

　　「相見歡」估唔到初跑谷草差啲贏埋，陣上居然見唔到之前亂「片」的走規，賽績大有驚喜，估計加程亦會更佳。「浚鋒天河」重戴眼罩或起到刺激作用，而本身在三班此程亦常近，希望十一檔不會影響太大吧。

　　「俊威威」陣上時有追勢，卻欠穩定性，未知加配件效用，但總覺已差不多夠火候，應不出三兩場現形。「靚得開心」有級數，縮程唔擔心，邊線腳。「駿飛翔」唔係之前傷過及耐冇出，對佢更有信心。

第1場  第五班（40-10分）1650米

　　甜蜜至上跑到夠晒，又減夠分，剛仗仲試埋一哩的能力，基本上，部署步伐行得啱啱好，只要今場跑得番黐住「再度豪情」過終點的水準，重磅亦夠贏。「龍子」四平八穩，往績又準，只擔心重磅而已。

　　「年年開心」馬老卻持續有好演出，尤其在同程，冇理由唔拖。「華劍寶」1200米爆得，一哩又有Ｑ，大抵已反映現階段當弗。「浪漫添馬」如轉到1800米可能會有突破，此程擔心追唔切。「電訊財星」一檔係好，惜馬重繼續跌，體能是否喼到成疑問。

第2場  第四班（60-40分）1200米

　　鄉村傳奇四班點都有番咁上吓，而睇過佢之前兩場冇形勢一樣輸近，更覺今次五檔加柏寶的條件「骨」﹗「四季大同」及「萬人迷」都係成日引人而冇收成嘅馬，衰在上場又有走勢，如計埋檔位因素，後駒秤高啲。

　　「帶利財子」唔叻但速度算可靠，用小將抵銷加分壓力，尚有殺傷力。「連戰連勝」剛仗唔斷尾，反映韌力漸養成。「一路奇兵」轉彎仍「甩咳」。「金大人」跑得多咗，未必係好。「太陽昇」回到此程兼隔番一輪先跑，幫助好大。

第3場  第四班（60-40分）1650米

　　九龍寶中長途均速性能，嘗試來到一哩可能會好，二檔亦唔難守好位，畀埋呢次機會。「得運寶」狀態喼得好，只係驚鞍上人的發揮。

　　「神州穿梭」腳傷復出首仗表現收貨，保持到出賽頻率，預期呢次會叻啲。「愛睦善」一連兩場在同程演出麻麻，前仗賴外叠縮後咗，上場就直路頭被夾，和曾被鞭擊中馬鼻，尚有原諒的理由，建議拖多一次。「再來旺財」、「瀟灑財星」及「開心錢」等等，太多馬或會搶，未必有利佢哋。

第4場  第四班（60-40分）2200米

　　勝利福星大長途最啱，可能擔心早段跟唔住，加番眼罩作保險，總之兩仗前可一條直路殺晒，能力唔係同場對手可比。「瀟洒大少」只係準，陣上冇乜板斧了。

　　「超勇駿」再加程經已冇乜把握﹔反而「廣友名駒」會愈長愈好。「友誼奧運」此程性能又係靠估，但點都要尊重其近績。「稻庭烏冬」及「心寶貝」買Ｔ或Ｆ可拖埋。「活威小子」上仗升班表現勝預期，今仗增程會仲好。

第6場  第三班（80-60分）1650米

　　發達心聲唔易贏，只係陣上使命感重，加埋檔好、配搭好，才會作Ｑ膽。「文武精英」如步速快便啱追，惜重磅及外檔或有影響。「超勁精神」處境和前駒一樣，早段扯得快，就係佢世界。「追月」剛仗韋達如何演繹，各位心中有數，再彈亦無謂，呢次一檔如果唔再笨到好似上場咁又約束，沿途咬住好位，直路鬥檻，對手唔易反先佢。

　　「勁飛馳」一哩冇問題，總好過跑短途，只係大外檔或削減威力。「重量級」上場唔放，兼唔守好位，畀佢吹到脹，呢類馬陣上隨時一改跑法便翻身。

第7場  第三班（85-60分）1000米

　　美猴王不用諗1200米縮到此程問題，始終贏三場仍未有對手可於末段威脅到，超級馬在三班贏晒卡士。「xxx之星」試出彩虹，專注此程要追。「魅力漢子」此程嫌短，但忠心與谷草性能加起上嚟，未必冇得爆。

　　「風之子」跑落有進，用德叔可能仲好。「應變計劃」和「桃李滿門」相繼排中外檔，影響甚大。

第8場  第二班（100-80分）1650米

　　鷹闖二班唔算超級，不過轉來谷草卻凸顯實力，有埋好位更理想，交出之前與「秘密行動」串Ｑ水準，唔難食尾胡。「幸福紅椒」磅輕及檔好，回到二班也不怕。「好德煌」好開，轉此程亦得。

　　「特寶樂」試埋大閘及加眼罩（上季2W1Q有戴罩），誠意夠晒。「福喜」一哩未必爆得起，不過二檔會食到形勢。「開心多多」總認為差唔多係時候爆一爆，博冷腳可諗。「暢蝦王」十二檔真係唔易克服。