賠率有路捉：旭之光有飛要防

聪明的白痴

　　第二場大熱同次熱係「萬人迷」同「帶利財子」唔出奇，一隻配韋達，另一隻新勝再出，但奇就奇在第三熱門居然唔係「四季大同」，又或者「鄉村傳奇」，反而落在「旭之光」身上。呢隻自購馬喺港十戰未入過三甲，上鋪仲係廿幾倍冷馬，噚日賣到咁熱肯定利計。

　　睇番隻馬前一仗喺同程四班1200米追入殿軍，距離頭馬「幸運愛駒」個幾馬位，以後駒其後同程再捷，「旭之光」肯定係機會馬之一。唔講唔知，原來此駒前仗跑谷草1200米，隔夜已經賣到得六十幾蚊，證明一早有人睇好，今晚隔紗再爭1200米，配合埋早飛，肯定係目標所在。

　　另外，第六場黃汝安馬房「勁飛馳」就熱得離奇，同場有「追月」同「發達心聲」，早飛佢居然熱到四倍大熱，位置仲要係1.0，可以話孭起晒成個彩池。留意隻馬上仗賽前過關飛好勁，似乎有人一早睇好，今日原庄配馬偉昌再出，以近排騎練合作旺勢，點可以睇小呀﹖

扒冷博衛韜禮

　　騎師王方面，衛韜禮騎足八場，仲有十幾倍，值得小注玩吓。除咗有飛睇好嘅「旭之光」外，仲有「華劍寶」、「得運寶」同「應變計劃」三匹實力馬，相比起韋達同柏寶咁熱，絕對抵博。

周仲