高普奉獻第一刺

猪拉多纳

紅軍易帥大變革

邊食晚飯邊睇「高普處子戰」Perfect池呀！萬眾期待，今晚英超早場將前多蒙特名帥高普首次領軍嘅利物浦，到訪白鹿徑球場大戰熱刺。全球球迷都好想知道，究竟呢個激情主帥到底會施展嘅乜嘢魔法，可以點石成金，令頹咗好耐嘅紅軍嚟個大翻身？利物浦今仗雖有前鋒賓迪基同丹尼艾格斯因傷缺陣，幸菲臘比古天奴、史杜列治兩大進攻核心今仗可以披甲，遇着狀態大勇嘅熱刺又係鬥攻格，有條件延續近6次對賽全開大盤嘅紀錄，再追入球大！

（now 621周六晚7時45分直播）
崇尚進攻作客唔龜縮

高普執掌多蒙特期間，崇尚快速嘅進攻足球，仲形容自己嘅足球風格係「重金屬音樂」，佢明言如果打守勢波，球迷根本沒必要入場，因此不少利迷均非常期待佢嘅到來，會為紅軍帶來一番新景象。今仗係該位名帥嘅「處子戰」，作客熱刺亦唔會龜縮，誓要排個全攻陣踢漂亮足球，希望省靚招牌，以冧一班紅軍粉絲。

名牌新帥上場效應，紅軍今戰定必士氣大振，雖然狀態大勇嘅丹尼艾格斯日前喺操練時整傷膝頭十字韌帶，提早收咧，好彩進攻樞紐菲臘比古天奴及時傷愈，配合已復出嘅高效射手史杜列治，利記要入波相信冇難度。
對親熱刺例演入球騷

熱刺同樣有前鋒孫興民因傷避戰，不過球隊上仗作客史雲斯有中場基斯甸艾歷臣省入兩粒，王牌射手哈利卡尼亦喺上仗主場炒曼城4比1一戰轟入1球，打破入球荒，信心返晒嚟，熱刺今場鋒力靠得住喎！

事實上，兩軍同屬爭英超前4嘅對手，近季對賽亦鬥得非常燦爛，近6次對賽全開入球大，合共炮製咗25粒入波，相信呢場都唔會例外繼續駁火，捧大好合理！