博利雲特讓和好過

猪拉多纳

皇馬雙星面和心不和

正所謂兄弟同心，其利斷金，但若然兩大球星面和心不和，球隊成績都幾難唔受到影響。皇馬兩大箭頭C朗同加里夫巴利近日再傳出不和消息，適逢球隊飽受FIFA病毒困擾，又要留力歐聯大戰，呢鋪「銀河艦隊」主場對住利雲特未必炒得起，隨時贏2粒就收手，讓球主客和皇馬讓2球不妨冷敲4.55倍讓球和。

（now632台周六晚10:00直播）

西班牙《阿斯報》透露，巴利經理人巴內特前排暗寸C朗，聲稱巴利要成為世上最佳球員，而唔係賣內褲賣得最多嘅模特兒。此番說話明顯辣着C朗，呢位葡萄牙國腳隨即向主帥賓尼迪斯施壓，要「大聖爺」同自己道歉。
賓施馬莫迪歷占士仔打柴

消息指起初巴利唔肯道歉，但前日歸隊訓練前夕，「大聖爺」突然向C朗低頭，仲話打算解僱巴內特添，究竟係咪迫於球會壓力就冇人知喇。之不過巴利早前先呻過自己幾努力都好，喺皇馬始終不受重視，更直言冇乜隊友有佢手機號碼，所以即使威爾斯喺歐國外出線，都唔會收到幾多隊友道賀，同隊友關係疏離到咁，話心入面冇條刺巉住都冇人信囉。

撇除內訌消息，士哥拿C朗連續4場西甲啞火，更大鑊係首席射手賓施馬打柴，聯同莫迪歷、占士洛迪古斯一齊缺陣，點會對皇馬火力冇影響先？再講吖，「銀河艦隊」仲要顧忌下周中作客巴黎聖日耳門嘅歐聯大戰，呢鋪邊敢去盡。何況利雲特近5次作客巴拿貝球場，其中3次都只係輸2粒走人，呢次造訪隱憂多多嘅皇馬，未必係一副羔羊待宰格局。