銀河搶分打劫伐木者

猪拉多纳

美職常規賽進入最後大直路，大部分球隊得番兩場波，其中名牌勁旅洛杉磯銀河於西岸落後榜首FC達拉斯三分，今場主場對波特蘭伐木者絕對係搶分好時機。雖然排緊西岸第七嘅伐木者都要為季後賽席位而戰，不過銀河主場實在太屈機，聯賽近八主場贏咗七場之外，當中有六場係至少贏兩球，讓球盤銀河讓一球，上盤捧得過！

（TVB 302周一早上7時直播）

今仗係銀河今季常規賽最後一次主場賽事，有乜好得過用一場大勝嚟謝幕？開季表現不穩嘅銀河喺六月開始發威，代表作就係主場大炒費城聯5比1，跟住下一仗主場就係面對今場對手波特蘭伐木者，銀河又大勝五蛋，所以如果話伐木者毫無餘悸肯定係假嘅。銀河王牌射手羅比堅尼腳風極順，另一星級戰將謝拉特亦狀態不俗，球隊不但要搶分爭做西岸「一哥」，仲要確保唔好畀第三位嘅溫哥華白帽後來居上，所以今場冇得放鬆，一於大勝番場向列強下戰書！
戴拿模防線穿窿捧對家

另一場直播賽事就由西雅圖海灣者作客侯斯頓戴拿模，戴拿模近期防線崩潰，近九場聯賽有七仗係至少失兩球，加上今場有中場美莫洛迪古斯停賽，海灣者受讓當然要捧場喇！（TVB 301周一清晨5時直播）