平手撐祖記有計

猪拉多纳

國米威完無以為繼

今晚有乜好嘢陪大家？唔使審梗係要吼實「意大利國家打吡」，國際米蘭主場迎戰祖雲達斯。「藍黑軍團」今季喺意甲開局取得5連勝，點知打後無以為繼，相反「斑馬軍團」連贏2場愈戰愈勇，仲有一班主力傷愈候命，即使呢鋪作客依然有力延續自己對國米連續6次不敗嘅紀錄，平手盤幾大都撐1.95倍祖雲達斯。

（TVB 301周一凌晨2:45直播）

所謂寧買當頭起，就莫買當頭跌。國際米蘭喺季初係威係勢連贏5鋪，點知佢哋先喺主場鬥費倫天拿，被人打破不敗金身不特止，仲要輸到1:4咁肉酸，班波之後仲未瞓醒，上輪聯賽只能作客同森多利亞打和1:1，隊波狀態明顯下滑，即使今晚佢哋有前鋒祖維迪復出都靠唔住。
「斑馬」兩大主力復操踢得

何況「藍黑軍團」近年對住祖記例必腳軟，莫講佢哋連續6次都未贏過對手吖。就算對上5次喺聖西路球場擺下龍門陣，亦只能勁羞家咁錄得2和3負不勝戰績，證明即使佢哋坐擁地利，對住「斑馬軍團」都係冇晒辦法。

唔講往績只論近況，祖雲達斯亦同樣佔優。呢支意甲班霸連勝2仗，經已擺脫季初頹態。而且大戰前夕佢哋仲收到好消息，陣中兩大主力艾華路莫拉達同保羅普巴，早前雖然喺國際賽檔期受傷，不過兩人好得七七八八經已復操。主帥阿里基仲大派定心丸，表明佢哋可以落場搏殺，大大提升祖記數胡能力，平手盤撐佢哋至少封咗道蝕本門先囉。