兵工廠拜仁大「箭」鬥

猪拉多纳

一隊非勝不可 一隊愈贏愈有

歐聯今晚戰火重燃，焦點必數阿仙奴火併拜仁慕尼黑嘅F組大戰。「兵工廠」瀕臨出局邊緣，主場鬥拜仁不容有失，預期佢哋喺酋長球場出擊實會搶攻爭3分。阿歷斯山齊士同羅拔利雲度夫斯基着晒火，最近喺球會同國家隊級別嘅賽事入波當食菜，兩大最Fit射手大鬥法，1.62倍入球大趁熱食啦！

（有線61及201、中央5台周三凌晨2:45直播）

阿仙奴今屆歐聯分組賽出閘脫腳，先後踩蕉皮輸畀薩格勒布戴拿模同奧林比亞高斯，1分都冇，嚟緊歐聯兩鬥拜仁再有差池嘅話，隨時係球會近16年嚟首次無緣進身呢項賽事嘅淘汰賽階段。查實「兵工廠」喺英超走勢唔錯，最近連贏3場，當中包括大炒曼聯3蛋嘅代表作，難怪前鋒禾確特賽前雄心勃勃，揚言球隊絕對有本錢做低拜仁喎。
Fit爆A山 要打救阿仙奴

「禾仔」移任單箭頭之後，表現愈嚟愈好，佢嘅前線拍檔阿歷斯山齊士仲堅，連埋幫智利踢世盃外在內，「A山」已經連續6場有「士哥」，一共轟入10粒。「兵工廠」家陣背水一戰，可以預期領隊雲格肯定會落Order全力搶攻，唔慌會踢得保守。

你肯攻，拜仁就肯定最開心！呢支德甲班霸行軍迅速，轉守為攻一流，齋睇多蒙特本月頭唔識死鬥攻輸1:5收場，就知拜仁係幾咁得人驚。啱啱破德甲紀錄創造開季聯賽9戰全勝嘅佢哋，新季戰績咁好，全靠湯馬士梅拿同羅拔利雲度夫斯基做到嘢。
梅拿 羅拔仔夾埋省21粒

梅拿同「羅拔仔」今季已合力炮製21個入波，當中畀阿仙奴名宿亨利譽為當今球壇最強9號仔嘅「羅拔仔」，近7次為球會同國家隊上陣喪入15球，由佢同梅拿衝鋒陷陣，就算「小飛俠」洛賓趕唔切傷愈復出，火力都一樣咁堅。一隊非勝不可，一隊就氣勢如虹，加埋大家都有當Fit箭頭壓陣，呢場「大」龍鳳實做得成！