飛腳主場大反擊

猪拉多纳

FC廣州為獎金搏命攻

今晚亞冠4強次回合繼續「中日大戰」，中超班霸FC廣州（廣州恒大淘寶）作客日職勁旅大阪飛腳。賽前飛腳宣布主帥長谷川健太續約消息，球隊士氣大振，為爭入決賽勢必搏老命；FC廣州雖然首回合領先1球，但因失咗1個作客入球，今仗亦不能踢得太保守，況且贏1球有500萬人民幣（約610萬港元）獎金刺激下必搶攻，加上近6次造訪日職球隊，有5次同對手合演入球騷，首選大盤。

（now 670周三晚6時直播）

飛腳近期頻傳喜訊，先喺上周中日聯盃次回合反勝新潟天鵝殺入決賽，賽前球隊更宣布同主帥長谷川健太達成續約協議，雖未有透露太多細節，但有指年期為兩年，甚至有傳若果於亞冠捧盃，長谷川健太年薪將達1億日圓（約650萬港元），令士氣大振。飛腳貴為2008年亞冠盟主，長谷川健太揚言要終結日職球隊7年來無緣決賽嘅尷尬局面，佢今仗更刑滿可親自督師。

首回合飛腳雖以1比2敗陣，但成功拎到1個寶貴嘅作客入球，意味住今仗只要不失球情況下贏波，例如小勝1比0，即可淘汰FC廣州殺入決賽，加上有宇佐美貴史、坐完波監嘅安達臣柏德列及老將遠藤保仁壓陣，兼有主場大批fans打氣下要爭取入波唔難。
恒大訪日例多波入

領先一粒嘅FC廣州（廣州恒大淘寶）如果唔想坐以待斃，最佳方法係今仗爭取作客入波。FC廣州中前場坐擁三大森巴兵艾傑臣、列卡度高拉特及荷西保連奴，仲有連續兩場亞冠轟入世界波嘅黃博文，火力絕對唔係人咁品，而且FC廣州喺4強實行贏1球有500萬人民幣獎金政策，贏得多擸得多，佢哋落到場名副其實「搶錢咁錢」爭士哥，加上FC廣州之前6次造訪日職球隊，有5次同對手大手交易，預計今仗入波唔會少，大盤有1.75倍咪錯過。