光輝夠謹慎延續聲細

猪拉多纳

澳洲足總盃4強今日上演強勁戲碼，由珀斯光輝主場火併墨爾本城。由於距離總決賽只有一步之遙，預計兩軍都會踢得小心翼翼，加上珀斯光輝今屆喺晉級過程中全開細盤，面對傷兵滿營兼啱啱踢完打吡戰嘅墨爾本城，就算有主場之利亦未必會輕舉妄動，阿謙今仗推介入球細。

（有線64及203台周三晚6時30分直播）

上屆澳足盃亞軍珀斯光輝，深明踢盃賽時防守嘅重要性，球隊之前3圈無論係對低組別球隊昆士蘭獅隊，抑或澳職同級球隊紐卡素噴射機同中岸水手，法定時間都打和兼開出入球細，對後兩者更要捱到互射12碼先晉級，證明光輝喺澳足盃堅持穩守策略。光輝今仗續有中場薩哥維治同阿歷斯格蘭因傷缺陣，加上球隊喺澳職首兩場都輸波而且失波唔少，今仗相信都係會做好防守工作先，然後再諗點樣進攻。
墨城傷兵滿營谷唔起

墨爾本城近期亦飽受傷兵困擾，前鋒哥利加美路、麥克馬連奴及哈利洛維奴；中場積及美爾寧同占姆士布朗、後衞法蘭積等主力有傷唔踢得，而中場加魯斯奧足踝有傷上陣成疑，加上球隊剛喺上周六踢完「墨爾本打吡」，最終以2比3不敵墨爾本勝利，傷兵滿營加上士氣受打擊，今場點會咁快回到氣，就算想強攻對手都未必咬得入，面對唔敢冒進嘅光輝，今仗有利開細盤。