中央陸軍 曼聯 駁火做大騷

猪拉多纳

現代足球講究整體踢法，做獨行俠追求單打獨鬥已經唔多work。好似曼聯上仗英超作客愛華頓，收起「毒瘤翼鋒」迪比後，攻勢明顯流暢得多。呢鋪紅魔鬼造訪歐聯B組對手莫斯科中央陸軍，有望繼續數胡，弊在佢哋作客防守唔多穩陣，捧1.95倍入球大比較穩陣。

（有線61及201周四凌晨2:45直播）

繼承曼聯7號波衫嘅迪比，季初以新C朗姿態登場備受球迷追捧，但自從佢喺歐聯附加賽首回合主場鬥布魯日梅開二度後，表現明顯走下坡，仲退化成「獨扭翼鋒」，不時中斷球隊攻勢。領隊尹戈爾痛定思痛，上仗作客愛華頓收起呢粒毒瘤，最終紅魔3:0炒起愛華頓，火力明顯有改善，難怪有球迷挪揄冇出場嘅迪比至係全場最佳球員。
曼聯路爾斯華倫西亞復出

紅魔賽前亦收到好消息，路爾斯華倫西亞趕及復出，可以隨隊出征，呢位翼衞6年前曾攻破對手中央陸軍大門，為球隊絕殺贏1:0，今戰隨時後備落場做救兵。就連桑馬達賽前亦話成班隊友搵佢教路，睇嚟一眾射手要入波唔難喎。
中央陸軍主場例入波

不過要留意嘅係，曼聯防守唔算穩陣。唔計上仗作客拖肥糖，紅魔喺較早前4場作客賽事，每仗平均至少失守2次，都咪話唔牙煙。況且中央陸軍今季正式賽事主場未輸過，更例必有波入，一對箭頭杜姆比亞、阿密特穆沙入波頻頻，近4仗勁轟6粒。睇番形勢，目前B組4支球隊同得3分，邊隊贏波出線機會大增，和氣收場反而益咗其他隊，為咗爭出線，呢場駁火戰睇怕都走唔甩！