FC廣州平手盤起飛腳

猪拉多纳

落重本做足準備征日本

亞冠盃準決賽首回合主場贏2:1嘅廣州恒大淘寶（足智彩譯FC廣州），次回合作客挑戰日職豪門大阪飛腳坐和望贏，平手盤梗係要恒大1.76倍客勝啦！

（now670台周三晚6:00直播）

恒大呢期雖然中超、亞冠兩線作戰，兼且硬仗連場，但係似乎愈踢愈精神，佢哋早兩日响聯賽淨勝天津兩球，只要喺剩低兩場大戰（主場對山東、作客對北京）攞到2分，就可以成功衞冕中超冠軍。至於亞冠盃呢一邊呢，恒大首回合贏波，今場只要唔係輸0:1以至淨負球過1球，一樣可以躋身決賽，形勢同聯賽爭霸同樣咁有利。

雖然打和都掂，但係恒大由上至下都冇呢種消極諗法，好多球員都希望贏波晉級，統帥部為咗畀班球員食好住好，再贏一場好波，唔單只响大阪包起咗5星級酒店嘅其中兩層做大本營，仲自帶廚師、保安添，甚至為防飛腳玩嘢，恒大自己早就搵咗一個球場練波，準備得非常充足，擺到明就係想Ｗ多場。
史高拉利領軍穩陣

不過，飛腳近排狀態好弗吓，唔單只聯賽、盃賽兩連勝，上星期六贏浦和紅鑽場波，中場小將井手口陽介全場奔跑咗12.63公里，成為呢一輪日職之最，35歲老將遠藤保仁更加榮升「最年輕」達到日職500戰嘅球員，由老至嫩都咁弗，難怪今野泰幸夠膽話要贏恒大嘞。

由於史高拉利同啲唯美派巴西教練唔同，好識得乜嘢叫做穩紮穩打，從來唔會冒險，所以恒大今日既唔會死守，亦唔會貿然搶攻，肯定由中場開始壓迫飛腳，慢慢等機會一錘KO對手，呢啲環境肯定玩平手盤好啲。