墨爾本勝利擊落噴射機

猪拉多纳

作客9場不敗勁穩陣

今日晏晝澳職有場獨腳戲，由上季包尾大幡紐卡素噴射機，喺自己地頭恭候上季常規賽盟主墨爾本勝利。勝利上場喺「墨爾本打吡」砌低墨爾本城，就連球隊神射手貝利沙亦順利開齋，家陣班波士氣高漲，梗係想再下一城，呢次就算作客到噴射機讓半一都唔驚，1.92倍上盤夠穩陣。

（有線64及203台周五下午4:40直播）

勝利今季開季演出對辦，連埋足總盃在內，5場比賽一共取得4勝1和佳績，成班球員明顯上晒力。至重要嘅係，主力射手貝利沙上仗聯同鋒將賓卡法拿、巴巴路西斯齊齊開齋，今仗仲有中場布洛斯咸復出，大有條件開火擊落噴射機。
噴射機新帥輸經驗

事實上勝利作客表現向來穩定，佢哋已經取得跨季聯賽作客9場不敗佳績。只要球隊今仗唔輸，即可創下球會聯賽最長不敗場數嘅新紀錄，相信一眾勝利球員今仗唔會手軟，實行用勝仗刷新新一頁。

雖然對手噴射機開局唔算差，取得1勝1負成績，之但係球隊新帥史葛米拿執教經驗尚淺。呢位34歲少帥之前最叻都只係教過富咸青年軍，邊有可能咁快一面適應澳職，另一面又同球員咁快擦出火花吖。何況前鋒夏列迪、門將比列基迪打柴，怕且呢鋪佢哋迎戰勝利都係要放低3分交吓學費先得咯。