總成績被爬頭唔再hea

猪拉多纳

浦和紅鑽踩爆東京

日職已經去到最後衝刺階段，今日有得直播嘅3場波入面，廣島、鹿島要爭次階段冠軍，作客都肯定搏命，贏面始終高半線，但係講到會打甩髀嘅，肯定係首階段冠軍浦和紅鑽，事關佢哋到咗唔可以失分嘅境地，客戰FC東京都有權開個1.87倍Ｗ。

（有線61、201及148周六下午1:00直播）

由於踏入次階段一直响度hea，首階段以6分優勢帶出嘅浦和，家陣喺總得分畀廣島三箭追到65分同分，仲因為淨得球少對方成9個咁多，跌咗落去全年總排名嘅第2位，假如再唔發力追番過頭，就冇法子以全年總分第1名直接進入季後賽總決賽，唔到佢哋唔搏。

今日就係浦和爬番上全年第1名嘅好時機嘞，因為廣島作客甲府風林向來唔掂，9次客戰甲府得2勝1和6負，而且甲府呢期好似食咗藥咁，4戰不敗兼1球未失，廣島贏都會非常吃力，衰起上嚟打和真係唔奇，呢場波玩1.57倍入球細總好過博廣島1.74倍客Ｗ。
鈴木啟太望以冠軍告別

正因為廣島有失分危機，浦和雖然對住隊硬嘢FC東京，但係都冇得選擇，惟有搶攻博全取3分。尤其中場老大哥鈴木啟太早兩日宣布季尾離隊，下季好大機會過去FC橫濱踢日乙，呢位34歲前日本國腳已經講到明，希望班細嘅幫幫手攞個聯賽冠軍，等佢開開心心咁走，浦和班人點敢好似過去兩個月咁hea吖！

睇番過去11次浦和作客味之素球場對FC東京，攞到6勝4和1負超過5成嘅勝率，今場博客勝真係無妨，事關東京除咗龍門權田修一久休復操，守衞森重真人傷埋，今日係夾硬紮住上，對住如狼似虎嘅浦和，頂得住半場都未必捱得到全場，玩客勝冇壞。