被破不敗身谷埋成肚火

猪拉多纳

拜仁誓炒科隆挽回面子

啱啱畀人打破今季不敗身嘅拜仁，今晚重返德甲將會喺主場出戰科隆。家陣呢支德甲霸旅谷埋谷埋成肚火，實行搵對手做出氣袋都似，就算呢鋪佢哋讓到2球，都照樣撐1.75倍讓主。

（now672台、有線61及201周六晚9:30直播）

拜仁今季開局連贏12鋪，點知上仗作客阿仙奴失手，以0:2敗走酋長球場。雖然球隊輸波收場，但實情拜仁呢場波表現唔係差，只能怪對方門將施治太神勇，今次對住人腳差一大截嘅科隆，點都要一吐烏氣炒起對手。
前線孖寶入球保證

講火力大家對拜仁真係定過抬油，唔計前排「五福臨門」講到悶嘅羅拔利雲度夫斯基，另一鋒將湯馬士梅拿同樣可靠，聯賽9戰攻入8粒，有呢對士哥孖寶壓陣，科隆成班後防肯定有得震冇得訓，準備好連續5次輸畀拜仁都得咯。