切爾達勢盛唔赦皇馬疲兵

猪拉多纳

今晚西甲將會上演榜首大戰，由切爾達主場硬撼皇家馬德里。係，大家冇睇錯，家吓切爾達係西甲「二哥」，佢哋季初表現神勇，先後作客殺敗實力分子西維爾同維拉利爾，更喺主場大勝過巴塞隆拿，當然去到季尾會唔會打回原形係未知數，不過以依家嘅勢頭，今晚喺舟車勞頓嘅「銀河艦隊」身上攞到分，絕對唔出奇，1.88倍嘅切爾達「讓球主勝」捧得過。

（now632台周六晚10:00直播）

切爾達新季西甲錄5勝3和嘅不敗戰績，同皇馬、巴塞兩大班霸同得18分。呢支奇兵上星期造訪維拉利爾，憑戰頭洛尼圖完場前入波絕殺對手，攞足三分，士氣好到不得了。陣中一對前線孖寶洛尼圖同伊亞高艾斯巴斯合共貢獻10個入球，效率勁高，係球隊入球泉源。今晚又有主場優勢，「張峰」睇好佢哋立於不敗之地。
皇馬BBC威力跌Watt

皇馬週中歐聯作客大戰巴黎聖日耳門，結果賽和0:0。冇錯，自從賓尼迪斯上任之後，皇馬防守力確係進一步提升，但係有得必有失，前線嘅「BBC」組合今季威力明顯唔及上季。C朗同賓施馬分別交出6個「士哥」，不過C朗有5個入波喺對愛斯賓奴所得，整體入球率同2演出都唔算穩定，加埋一路傳緊佢同加里夫巴利爭做大佬鬧不和，陣營嘅氣氛真係麻麻。

再講，皇馬今季曾經畀希杭同馬拉加守和，今晚疲兵造訪士氣大勇嘅切爾達，相信都唔會易食，慢吓手切爾達爆冷贏埋都唔係冇機。