美職D-Day煞科搶灘

猪拉多纳

上世紀1944年6月6日，係二次大戰有名嘅D-Day；而聽朝清晨開始上演嘅美職煞科日，則係當地球壇「D-Day」，事關呢日係決定東西岸邊6支球隊，可殺入季後賽嘅Decision Day！
奧城革命爭搭尾班車

東岸方面，紐約紅牛已經肯定坐穩東岸一哥之位，拋甩第2位嘅華盛頓聯隊6分咁多，但由2至6位每一位只係相差1分，夠晒緊湊！至於季後賽最後一個席位，就屬新英倫革命同奧蘭多城之爭，奧蘭多城依家少第6位嘅革命3分，常規賽賽制係若然兩隊同分，先會以較多勝仗嚟釐定排名，然後先計得失球差，奧蘭多城依家勝仗比革命少一場，得失球差更係爭8球，即係話，奧蘭多城今場作客費城聯，唔單止要大炒對方，仲要寄望革命作客紐約城輸鑊甘，難度超高！

奧蘭多城近期踩行油連贏5場，前鋒施利拿連近3場狂轟6球着晒火，今場作客等緊收咧嘅費城聯，唔理得革命嗰邊點，一於做好本分擸晒3分再算。

（周一清晨5時開賽）

同時間開賽嘅新英倫革命作客紐約城一戰，革命近4戰輸咗3場，好彩紐約城無心戀戰，防守又曳，近12主場只係得1場冇失波，最近又盛傳季後會易帥，軍心不穩，今場大盤值博。