新英倫革命坐和望贏

猪拉多纳

華盛頓聯隊欺善怕惡

美職季後賽明早開打，頭炮東岸賽事由華盛頓聯隊主場迎戰新英倫革命，華盛頓聯隊喺常規賽收咧戰慘敗，狂吞機員五蛋，最弊係華盛頓聯隊並非因為留力而輸波，出晒主力都搞成咁，今場平手盤一於要革命！

（TVB 301周四早上7時30分直播）

新英倫革命雖然近況都唔太好，近五仗錄得一勝一和三負，但最重要係革命常規賽收咧戰以3比1作客擊敗紐約城，為季後賽打下一支強心針，更令革命粉絲鼓舞係神射手查理戴維斯上仗復任正選表現出色，交出一個入球兼助攻，佢為前線注入活力，亦幫球隊拉散對手防線，令中場尼古恩、基連路維、鍾斯呢班中場有更多空間去組織進攻。革命多咗查理戴維斯呢位猛將，實力大升呢呀！

華盛頓聯隊嘅頹勢由八月中開始，九場聯賽贏得兩場，但嗰兩場嘅對手係入唔到季後賽嘅紐約城同芝加哥火燄，對住蒙特利爾衝擊、哥倫布機員、紐約紅牛等躋身季後賽嘅球隊全敗，今場平手盤梗係捧革命。
銀河作客腳軟捧海灣者

另一場西岸嘅西雅圖海灣者主場對洛杉磯銀河，衞冕總冠軍銀河以失望嘅表現完成常規賽，佢哋喺西岸位列第五，搞到失去主場之利。銀河係地頭蟲，一作客就例牌腳軟，聯賽近四作客輸足三場，有大勇丹普西壓陣嘅海灣者今場有望輕鬆搞掂對方，捧主勝！

（TVB 301周四早上10時直播）