侯姆城等畀勝利劏

猪拉多纳

澳總4強當表演賽踢

上星期珀斯光輝殺退墨爾本城晉級澳洲足總盃決賽，另一場4強戰，則由次級聯賽球隊侯姆城越級挑戰澳職王者墨爾本勝利，呢場波今日下晝就會喺墨爾本矩形球場上演，到時就會出到最終決賽名單。我認為單憑質素，勝利絕對高對手幾班，「-2」照捧1.72倍「讓球主勝」！

侯姆城難得殺入澳總4強，呢場毫無疑問係球會史上最重要一戰。賽前傳出佢哋四出斟介巨星助陣，而且為增加入場人數同埋收益，更同意放棄喺自己只得約5,000座位嘅主場，轉去墨爾本勝利另一個可以容納到超過3萬人嘅墨爾本矩形球場出賽，主場優勢都冇埋。
掛住搵巨星撐場

侯姆城賽前先後向朗拿甸奴、加拉高尼斯、阿達杜倫同查斯古特開出「一場合約」，可惜未能成事，從作戰決心睇，侯姆城呢種「表演賽心態」已經好明顯係「志在參與」啦！睇番8強，另一支次級別球隊海德堡聯咪一樣請希臘國腳加素蘭尼斯客串引起話題，最終下場就係喺過萬名球迷面前慘吞墨爾本城5蛋出局囉！
墨爾本勝利澳職擂台躉

其實侯姆城晉級過程都幾好彩，一路都無遇過「澳職」隊伍，喺32強同8強就要踢到加時至贏波，今日4強遇上強中之強墨爾本勝利，睇怕冇得再「符碌」喇啩，人家貴為澳職擂台躉，實力又何止高出一班？我預計呢場墨爾本勝利大勝晉級絕對無問題，決賽同珀斯光輝爭霸，亦係球迷希望見到嘅好戲碼。