馬體會開火轟爆拉科

猪拉多纳

第三位嘅馬德里體育會作客拉科魯尼亞，馬體會今季新簽射手積臣馬天尼斯連續兩仗入波，未來日子發揮應會愈來愈好，更何況拉科屬於馬體會嘅「私房菜」，雙方近七次聯賽交手，馬體會取得六勝一和，今仗讓半一，上盤值博。

（now 632周六凌晨3時30分直播）
積臣馬天尼斯腳風順

馬體會將於下周中歐聯C組，作客哈薩克球隊艾斯坦拿，雙方實力有明顯距離，預料馬體會屆時可凱旋而歸。因此馬體會今仗聯賽可以全力搏殺，力追皇馬同巴塞。馬體會經過月初小低潮之後，近況已回勇，連歐聯在內取得三連勝，包括上仗以2比1擊敗勁敵華倫西亞，其中積臣馬天尼斯又有波入，呢位哥倫比亞西腳上季為波圖轟入廿一球當上葡超神射手，只要重拾水準，勢必提升馬體會入波能力。唔好忘記陣中仲有基沙文、費蘭度托利斯，馬體會只要踩行油，拉科實招架唔住。

拉科魯尼亞上仗對攻力極弱嘅馬拉加都淨吞兩蛋，近三場聯賽都贏唔到，加上近七次聯賽對馬體會輸六次，當中四次淨輸兩球或以上，受讓半一都冇着數。