拜仁衝擊5大聯賽開季紀錄

猪拉多纳

搶韁爭位 繼續爆「法」

頭痕，哥迪奧拿呢鋪認真頭痕！今晚德甲拜仁慕尼黑作客法蘭克福，拜仁挑戰緊5大聯賽開季最佳紀錄，對住「私房菜」法蘭克福又係時候開殺戒，讓球主客和拜仁讓兩球，2.15倍「讓客」唔怕捧喎！

（now672台、有線61及201周六凌晨3:30直播）
贏波將平熱刺11連勝

拜仁喺聯賽開季10連勝，已經係德甲新紀錄，如果綜觀歐洲5大聯賽，就只係同意甲羅馬响2013-14嘅10連勝平頭排第2，仍然落後於英格蘭熱刺喺1960-61創下嘅11連勝，今仗贏波至可以平到歐洲5大聯賽開季紀錄。至於其餘兩大聯賽，分別係西甲皇馬1968-69創下嘅9連勝；同法甲里昂1936-37踢出嘅8連勝。
3翼奇Fit出邊個都得

拜仁周中德盃仲踢埋衞冕嘅禾夫斯堡出局添，新季只係輸過畀阿仙奴咁大把，表現堅猛！最得人驚係拜仁大把炮台，開季嗰陣都唔知幾多球迷擔心列貝利嘅傷勢，但係睇見「新扭神」杜格拉斯哥斯達同新星京士利高文交足貨，加上「小飛俠」洛賓傷愈復出之後火速重拾狀態，列貝利？慢慢抖吓先啦，唔使急住復出喎！拜仁兵源雄厚，堤亞高艾簡達拿同沙比阿朗素都唔一定有正選踢，加上今戰安排喺周五晚踢，哥帥唔需要特別為下周中鬥阿仙奴場歐聯留力，可以去盡。事實上就算哥帥稍作輪換，拜仁陣容依然十分強勁。
法蘭克福對賽輸條街

主隊法蘭克福今季有「癲佬教頭」艾明費回巢掌舵，簡直係球迷之福，點解？事關呢位名帥唔理咩情況、咩對手，老虎蟹都同你死攻，今季就試過炮製多場極具娛樂性嘅比賽過球迷嘆，包括主場大勝科隆6:2，以及喺自己地頭1:5輸畀慕遜加柏。拜仁最驚你唔攻，法蘭克福唔識死同呢支德甲班霸駁火，隨時輸爆廠都似。睇埋往績，啱啱喺德盃畀「德丙仔」奧厄淘汰嘅法蘭克福，近6次同拜仁交手輸晒，當中最近3次輸波球差起碼3球，唔捧「讓客」都對唔住自己啦！