曼聯又歎私房菜

猪拉多纳

連場不勝谷埋成肚火嘅曼聯，今晚英超作客硬撼水晶宮。雖然兩軍啱啱喺英聯盃出局，但曼聯近四次出戰水晶宮獲全勝，擺明格食格。而且水晶宮欺善怕惡，聯賽五次敗陣嘅對手全屬前六名球隊，加上中場核心卡比耶未必出得，勢成紅魔嘅出氣袋，簡簡單單捧客Ｗ。

（now 622周六晚11時直播）

曼聯近期明顯行緊衰運，先喺歐聯及聯賽打和莫斯科中央陸軍同曼城，周中英聯盃十六強更有朗尼、卡域克同艾舒利楊格宴客，互射12碼慘遭英冠仔米杜士堡淘汰，真係冇晒「飛士」。好彩紅魔迎來復甦嘅好時機，因為對手水晶宮見親佢哋都怕怕，雙方近四次於聯賽碰頭，曼聯全部贏晒，堅有格食格味道。
卡比耶上陣成疑

查實依家排第七嘅水晶宮表現唔錯，起碼唔使好似前幾季咁要憂心護級，不過佢哋剛於英聯盃被曼城大炒五個一皮，對信心同士氣點都有影響。水晶宮今季遇強即屈，聯賽五場敗仗咁啱得咁蹺都係輸畀前六名嘅阿仙奴、曼城、熱刺、韋斯咸和李斯特城，絕非偶然。主帥柏杜帶領下識得揀波踢，寧願集中火力向中下游球隊搶分，況且有傳中場核心卡比耶未好番上陣成疑，曼聯仲唔趁機歎呢碟「私房菜」咩？