曼城手起刀諾開殺戒

猪拉多纳

英超榜首曼城今晚主場迎戰諾域治，「藍月亮」上仗喺曼市打吡同曼聯打和，已被阿仙奴追至同分，只係靠得失球差保住一哥位，故今仗冇失分空間。「金絲雀」諾域治聯賽已經3連敗，作客紐卡素更狂失6球，可見防線勁曳，今仗面對英超火力最強嘅曼城，相信都係難以招架，加上「藍月亮」今季喺5場聯賽主場有4戰都能淨勝對手兩球或以上，今仗直取讓球主勝。

（now 621周六晚11時直播）
諾域治不設防等炒

曼城上仗聯賽悶和曼聯0比0，今季首次喺聯賽交白卷，而冇波入嘅原因係領隊比歷連尼起用費蘭甸奴、費蘭度法蘭斯高同耶耶托尼打3防中，只求穩守寧棄控球權，前線只係靠史達寧、奇雲迪布尼及韋菲特邦尼偶然打反擊，至令到攻勢寥寥可數。

不過，「藍月亮」喺周中嘅英聯盃16強再展現強大攻擊力，主場大炒水晶宮5比1，今仗喺主場出擊有力再開殺戒。

諾域治經歷聯賽3連敗，表現猶如不設防，佢哋喺周中嘅英聯盃16強同愛華頓激戰百二分鐘，仲要喺互射12碼被淘汰，無論對球員嘅體力定係士氣都有好大影響。更不幸嘅係諾域治今仗作客面對英超入波最多嘅曼城，後者24球入波中有17球喺主場攻入，除輸畀韋斯咸外，其餘4仗都能淨勝對手兩球或以上。

另外，「藍月亮」近年主場專炒升班球隊，好似上季就大勝昆士柏流浪6比0，今季亦曾贏過般尼茅夫5比1，今仗隨時又係一場大屠殺。