車仔讓唔起史篤城

猪拉多纳

冇寸王領軍 隨時又失分

今晚英超「護級」大戰，由第14位嘅史篤城主場迎戰第15位嘅車路士，呢場波好睇之處就係大家冇得睇「寸王」莫連奴喺場邊督師！「寸王」今場被罰停賽，場波嘅焦點終於可以落番喺兩隊波身上，車仔雖然喺周中歐聯贏波止瀉，但難保只屬虛火，史篤城以踢法硬淨防守穩陣見稱，今場主場有得受讓，捧得過！

（now 621周日凌晨1時30分直播）
歐聯贏基輔 可能係虛火

莫連奴一向係傳媒嘅焦點，誇張啲講句，電視鏡頭有時真係影「寸王」多過影場波，好厭囉！今場車仔冇咗莫帥喺場邊督師，表現係咪會差咗，真係好難講，但可以保證嘅係，即使今場莫連奴唔使停賽，作客史篤城一啲都唔易踢！

連續4場不勝後，車路士周中喺歐聯終於贏番場，不過贏得好險，要靠韋利安臨完場嘅射罰球先至以2比1絕殺基輔戴拿模，叫做暫時救番「寸王」一命。不過，車仔呢場波表現唔算特別出色，唔係韋利安入波，睇怕「寸王」已經落咗鑊，所以呢陣虛火係咪可以延續返聯賽，真係好難評估。車仔目前最大鑊嘅係防線唔掂，失波數字驚人，泰利在陣雖可穩定軍心，但佢今季回晒塘，冇速度、轉身慢，頻頻出醜，佢嘅中路拍檔加利卡希爾亦大跌Watt，今場對住梳頓沙基利、阿拿奧杜域同保贊呢班攻擊能手，真係難為呢位「鐵血隊長」咯！
梳爾哥斯復出 防線更穩

史篤城今場有後衞蒙尼沙同謝夫甘馬倫因傷缺陣，好彩踢法硬淨嘅隊長梳爾哥斯最近傷愈復出，防守靠得住，球隊近8戰僅得1負，其中上月尾喺英聯盃主場同車路士90分鐘打和1比1，最尾射贏12碼更將車仔淘汰出局，粉碎其衞冕好夢，球員心理上佔優，主場出擊唔驚呢部「爛車」，仲有得受讓咁筍，當然值得支持。