阿仙奴大熱爆北倫敦

猪拉多纳

打吡戰世仇鬥攻火藥味濃

今晚英超爆發「北倫敦打吡」，由阿仙奴主場火併同市死敵熱刺。阿仙奴於上周中歐聯慘敗畀拜仁，熱刺竟火上加油，借恭喜拜仁寸爆死敵，擺明落兵工廠面，令呢場打吡火藥味極速升溫。所謂仇人見面分外眼紅，阿仙奴必定搏甩髀贏呢場打吡攞彩，撞正熱刺前鋒哈利卡尼又重拾射門鞋，鬥攻格局實多波入，玩大盤好過。

(now 621周一凌晨零時直播)
賽前被挑釁 廠仔火都嚟

阿仙奴自王牌阿歷斯山齊士於9月尾作客李斯特城開齋後愈踢愈順，並全面激活奧斯爾、基奧特、辛迪卡索拉等前線拍檔，聯賽已連贏5仗，包括主場大炒曼聯3比0及作客輕取史雲斯3比0，狀態勇達巔峰。

不過阿仙奴上周中喺歐聯畀拜仁大炒五個一皮，出線形勢堪憂，個勢被打窒，而佢嘅北倫敦死敵熱刺不忘踩多腳，喺twitter鋪咗張嗰場波比分牌嘅圖片，然後向拜仁留言「早晨」示好，後者更回覆「唔使客氣」，擺明係挑釁阿仙奴，但係熱刺做埋呢啲小動作可能有效果，事關會進一步刺激「廠仔」今仗爭勝決心，希望藉打吡戰贏波挽回面子。
哈利仔弗番 熱刺有計

阿仙奴同熱刺仇深似海，每次碰頭都火花四濺。事實上，兵工廠主場對熱刺特別醒神，連盃賽在內，兩軍近5次交手，阿仙奴錄得4勝1和佳績，似乎熱刺造訪酋長球場並不太「老利」。

不過，打吡場合兩軍例搏，不能單純以實力、往績等因素來衡量高低，而且熱刺連盃賽亦係3連勝兼轟入10粒，狀態不遜於阿仙奴，何況前鋒哈利卡尼已擺脫季初嘅入球荒，連續3仗有波入之餘，合共轟入5球，腳風轉順，絕對係阿仙奴嘅心腹大患。加上打吡戰面子攸關，大家都想贏波，鬥攻之下入波唔會少，入球大有1.59倍乃不二之選。