洪禮賢講馬：賀年賽不要太理性

纯情小彩迷

　　從不道人迷信，但有啲野未必可從「籮直」或科學角度去解釋。咪攪錯﹗呢期唔係想寫X－file和大迷信，只是打個譬如，周三夜馬，韋達冇手風便是最佳例子，總之搏極都唔贏，唔理冷熱，唔理坐騎檔位好與壞，像「精彩生輝」硬係差一步追唔到，服未﹗

　　講開迷信，周三馬場內整咗兩個檔口，此為占卜攤檔，特別安排兩位中西資深占卜顧問，為入場觀眾講解流年，從鏡頭所見，唔少場內人士也感興趣（至少見到部分行家成坐上客），而據知（小弟偷聽），好似話講得幾準﹗好嘞，到了大年初三，沙田馬場一樣有類似的安排，麥師傅將出席開運講座，屆時講授虎年開運大法，及分析十二生肖虎年運程。

⑧號效應旺到唔信

　　洪某唔係突然間變了神婆，但記憶所及，大年初三跑馬梗係有啲嘢要信吓，就以近兩季為例，08年2月9日賽期，當日跑十一場，結果⑧號馬幾乎場場喺三甲，僅得「兄弟齊心」冇影（獲第五名），餘下十駒交出5冠2亞3季，該日不論係冷門「再勝多」，還是熱到得十幾蚊嘅「勝眼光」，總之與⑧有緣，就真係發﹗而上年又如何﹖雖然⑧號效應失色了，又未至於全部瓜直，⑧號仔「招財名駒」順利勝出，經已貼晒大年初三主題，之後再多一匹「金玉滿堂」，賀年二串三攪掂﹗

意頭馬揀家家興旺

　　來到虎年唔知會點，不過，望落報名表，唔少意頭馬，好似「家家興旺」、「大家開心」、「賀喜」、「當旺」等等，大時大節，偶爾碰碰運氣，不要太理性，或有意外收穫。