比利時當頭起主場剝牙

猪拉多纳

另一場重量級國際熱身賽，由「歐洲紅魔」比利時主場迎戰「狂牛」西班牙。正所謂此一時、彼一時，貴為「世界一哥」，比利時絕非浪得虛名，以夏薩特同奇雲迪布尼為首嘅「歐洲紅魔」，近8仗主場比賽贏7仗，包括日前強勢反勝意大利，相反西班牙雖然都7連捷，但自上年世盃肉酸出局後，已無復昔日一統天下嘅「狂牛王朝」霸氣，寧買當頭起，一於力撐比利時主W。

（now 632周三凌晨3時45分直播）

比利時近年人才濟濟，夏薩特、奇雲迪布尼、盧卡古及賓迪基等於英超獨當一面，帶動「歐洲紅魔」成為足壇新勢力，上年世盃殺入8強，而喺近13場正式比賽，「歐洲紅魔」僅輸1仗，而且佢哋主場出擊特別Sharp醒，近8次喺自己地頭出擊未輸過之餘，仲贏咗7仗，包括日前同勁旅意大利拍跳，落後一球下都可以反勝3比1，贏得極具說服力，該仗除咗奇雲迪布尼等王牌有料到之外，連效力馬賽嘅「二打六」巴舒亞伊都有士哥，難怪「歐洲紅魔」可以做到「一哥」。
西班牙遇硬嘢即跪低

西班牙話就話連贏7仗，不過擊敗烏克蘭、馬其頓及白俄羅斯之流嘅球隊，都係贏得一粒堅辛苦，睇得出佢哋自上年世盃分組賽出局後，現時處於重建階段，上仗淨勝英格蘭兩球表現亦唔算突出，中場悍將堤亞高艾簡達拿更受傷退隊。而且西班牙較早前於熱身賽試過輸畀法國、德國、荷蘭等強隊，同2008至2012年連奪三項大賽錦標嘅霸氣相比，可謂差天共地，點頂得住氣勢如虹嘅「歐洲紅魔」呀？主W不容錯過。