祖記傷兵潮難讓AC

猪拉多纳

意甲今晚祖雲達斯主場鬥AC米蘭，祖記有多位球員喺日前國際賽檔期受傷，加上下周歐聯要惡鬥曼城，腹背受敵下，今仗讓半一實在太辣。相反AC米蘭保持5仗不敗，改革開始見成效，球員踢出信心，梗係捧當頭起嘅AC下盤。

（TVB 301周日凌晨3時45分直播）

祖雲達斯近4場聯賽贏3場，以為見到曙光，但畀國際賽搞亂檔。門將保方、後衞列治史迪拿、馬田卡沙利斯及前鋒文迪蘇傑都為國家隊披甲時，受到唔同程度傷患。雖然各人傷勢唔算嚴重，但紮住上亦恐怕影響發揮。同埋佢哋下周中歐聯硬撼曼城，教練阿里基今場未必冒險畀呢批傷兵上陣，而且祖記今季遇上幾支強敵好似羅馬、拿玻里及國際米蘭都贏唔到，讓波好牙煙。
AC神童龍門加薪6倍

AC米蘭今季改由米赫洛域執教，引入多位新兵，經一段時間合後見到成效，近5場聯賽取得3勝2和。當中由米赫洛域發掘出嚟嘅16歲門將基安盧基當拿隆馬表現成熟，會方決定加佢6倍人工，去到100萬歐元年薪，相信呢位神童會更落力把守大門，祖記想入波就更難。