借題發揮：白德民虎年開工大吉 八九十場W得

纯情小彩迷

　　虎年賀歲賽對白德民嚟講好有意義，因為佢未跑上期之前，再對上一期贏馬已經數到6/1嘞，大大話話十期守齋，堂堂一廐之帥，邊有顏面，就算boss冇攻勢係佢成績忽然下滑原委，弊在連外線馬都幫唔到手先慘嘛！好在佢年初三整番隻「醉味」，全日埋單1W2P，總算虎年開工大吉，有時手風嘅嘢，一轉勢話嚟就嚟，好似阿杜咁，10月先開齋又如何，記得佢贏開嗰排，喼住做埋騎師王，所以，阿民手氣順番，呢期好多坐騎又唔係「脆」，一於同佢玩吓「扣」。

　　Well，雖然佢手馬係好，但有啲佢嘅馬，亨利就冇「吉士」去試，譬如第四場「四季大同」，係五時花、六時變嘅馬，追佢慘過追火車，唯一可取係跑番泥地之嘛！「頭盤」長期細細粒，成日近而冇三甲，呢類馬最怕！外線阿蔡兩件「好小子」和「龍騰」，前駒向來孭住個肚腩，點會好！後駒貨源可靠，不過，據知在外地冇試過閘，唔似同一買手入貨嘅廐侶「國寶」等，嗰便做晒嘢，落地後易適應，所以「龍騰」今季係咁試閘，趕唔趕到，以及加埋眼罩有冇用，兩睇啫！？

坐騎往績有說服力

　　要過關都係搵「鳥語花香」、「幸運愛駒」及「超群如意」，熱就熱梗，望望隔夜賠率，隻隻都三四十蚊，乘埋ok噃。至於呢三匹馬能力如何，都唔使講太多，大家都好熟，「鳥語花香」係蝦佢休出而已；「幸運愛駒」和「超群如意」就比較穩健，往績有晒說服力，又係嗰句，3 ｘ 1 位置，加多條3 ｘ 4 獨贏過關，簡簡單單，希望發少少新年財。

亨利