飛腳主場難折「箭」

猪拉多纳

遠藤未回氣 宇佐美走樣

日職改制後首次決賽今晚上演，大阪飛腳喺首回合主場對廣島三箭，讓平半要唔過。雖然飛腳鬥心超強，但對手廣島三箭踏入次階段賽事後，簡直着晒火，射手佐藤壽人更加打破入球荒，並且追平中山雅史保持嘅157球日職最多入球紀錄，信心返晒嚟下盤抵撐！

（有線61及201周三晚6:30直播）

飛腳日前作客加時後以3:1打沉浦和紅鑽，充分顯示出佢哋嘅韌力。之不過，飛腳隊長遠藤保仁已經35歲，唔夠時間畀佢回氣，始終好蝕底。另外，最近飛腳前鋒宇佐美貴史放風話，希望下季再次去歐洲外流，太多嘢諗似乎影響到佢嘅集中力，上場對紅鑽踢到72分鐘被換走，證明教練長谷川健太勁唔滿意佢表現。
三箭鋒線弗到震

另一方面，廣島三箭喺主場以5:0大勝湘南比馬後，有成10日時間休息，形勢着數好多，加上前鋒戴恩費斯杜格拉斯上場連中三元，延續近期弗爆狀態，射手佐藤壽人又克服心魔，打破入球荒追平中山雅史保持嘅157球日職最多入球紀錄，就算佢哋有後衞水本裕貴、川崎裕大及吉野恭平養傷，都有足夠火力玩死飛腳啦！
日職附賽制

採主客兩回合制，今輪為決賽首回合。兩回合計打和，計算作客入球優惠，未分勝負將於次回合法定時間後加時30分鐘，加時階段不會計算作客入球優惠，再和則互射12碼決勝。