史浩克上盤贏面諾觀

猪拉多纳

德甲獨腳戲史浩克04主場對漢諾威，史浩克經過連續兩個月低潮後近況明顯有起色，今仗喺主場迎戰護級對手，志切重開聯賽勝利之門，客軍受傷病侵襲，兩名日本主力援兵都無緣披甲，作客難望爆冷，史浩克讓一球撐上盤。

（now 670、有線61及201台周六凌晨3時30分直播）
漢諾威主將傷病纏身

史浩克季初表現同成績都甚佳，不過隨後受到傷停問題困擾，自十月中主場擊敗哈化柏林後，聯賽已經個半月未贏過，好在近期傷停問題終於過去，隊長賀維迪斯傷愈後已回復狀態，被寄予厚望嘅新中場主力祖漢斯基斯亦停滿復出，人腳整齊好多，球隊剛於歐霸盃贏波穩居小組榜首，上輪作客摸和勁旅利華古遜表現亦討好，球隊過去4季主場迎戰漢諾威都贏波，今晚有足夠信心同決心重響聯賽勝鼓。

漢諾威上仗主場大炒恩高斯達特止住頹勢，不過主要原因係對手忽然失準，球隊領軍人物清武宏嗣養緊傷，另一日本國腳酒井宏樹同主力門將薛拿又患病，前者已肯定無緣披甲，後者亦上陣成疑，作客史浩克恐難扭轉近季連敗厄運。