華倫讓主明益「里」

猪拉多纳

加利佬處子戰遇貴人

出門遇貴人，行步路都輕鬆啲，更何況執教球會！曼聯名宿加利尼維利早前決定越洋接受挑戰，出任華倫西亞新帥，處子戰即迎上球會歐聯生死戰，主場對H組對手里昂，壓力咪話唔大。好在佢今仗有兩大貴人照住，有望順利打響頭炮，撐2.28倍讓主。

（開賽時間：周四凌晨3:45）

過去甚少英倫領隊去西班牙發展，所以呢次加利佬成為蝙蝠統帥確令人意外，正因為咁呢鋪處子戰更加唔衰得。華倫西亞家陣落後真特1分，只要對方今輪失分，己隊贏波即可反壓對方殺入歐聯16強，一鋪就可以贏盡球迷歡心，加利佬今仗實扭盡六壬啫。
加利佬射爆過里昂

不過加利佬又唔愁喎，事關今仗有兩大貴人照住，第一個當然係細佬菲臘仔。佢擔任球隊助教一職接近半年，唔止輕易幫大佬融入新環境，亦有助佢盡快了解麾下球員強弱，方便排兵布陣。另一貴人係今仗對手里昂！大家都知加利佬職業生涯入波唔多，偏偏就喺04/05球季歐聯分組賽射爆過呢支法甲球隊幫曼聯贏波，明剋住對手。何況里昂狀態低沉，近5仗取得1和4負，加埋中場佐敦費利坐波監，加利佬想順利開紅門唔難吖！