阿仙奴大勝上榜首 維拉公園變練靶場

猪拉多纳

今晚英超早場，啱啱喺歐聯逃出生天嘅阿仙奴，將作客包尾大幡阿士東維拉，如果贏波即暫時升上榜首，現時兵工廠最當紅嘅梗係要數基奧特，「銀河唯一」近期唔單止入波停不了，仲係維拉剋星，而佢今仗只要入波，就會成為英超史上第3最快累積50個士哥嘅球員，加上之前3次碰頭阿仙奴均贏3粒或以上，14仗聯賽不勝嘅維拉，今場勢必成為一班「槍手」練靶嘅對象，就算受讓一球都咪掂，斯維力撐上盤。

（now 621周日晚9時30分直播）
基奧特入波效率勝C朗

阿仙奴上周中喺歐聯分組賽絕地反擊，靠「銀河唯一」基奧特大演帽子戲法，大勝奧林比亞高斯3比0，驚險躋身16強，基佬仲獲領隊雲格大讚係歐洲一流前鋒添！「教授」唔係賣花讚花香，早前英國足球網站Squawka一項有關今季數據，撇除12碼之後，基奧特喺聯賽出戰880分鐘射入8球，比起C朗用1,260分鐘入8粒同美斯用615分鐘入3球更佳。

依家基奧特確係着晒火，近8仗轟入7球，原來佢喺英超已經累積咗49個士哥，只要入多1球，就可以成為英超史上第3最快達到50個入球嘅球員，今仗咁啱撞正包尾嘅維拉，睇嚟個天都想造就佢。除咗維拉積弱多時，自開咧戰擊敗般尼茅夫後，連續14場聯賽未贏過之外，近5次正面交鋒，「銀河唯一」就攻入4球，堪稱維拉剋星，而且之前3次對碰阿仙奴全部贏3球或以上，真係未踢已經腳軟。
加迪未夠料 鬥唔過師傅

更何況維拉自從11月搵來前里昂教頭加迪接手後，4仗不勝冇乜起色，睇嚟加迪冇乜計扭轉頹勢，查實佢喺球員時代曾效力阿仙奴，係雲格嘅徒弟，雲師傅又點會唔知佢有乜嘢招數，見招拆招冇難度，加上阿仙奴剛於歐聯出線，士氣高昂，難得撞正落水狗維拉，加上贏波即升上榜首，所以一眾「槍手」嚟到維拉公園一於當對手靶嚟射，力爭一場大捷。讓球盤阿仙奴要讓一球都冇有怕，上盤有買趁早。