慕遜加柏摘梅氹球迷

猪拉多纳

德國盃早場仲有慕遜加柏主場對雲達不來梅，慕遜加柏啱啱喺上周末德甲畀利華古遜狂炒5蛋，破咗新帥舒拔上任後嘅聯賽不敗身，球隊上下都擱置咗所有聖誕慶祝活動，志切喺盃賽反彈，面對正集中精神護級嘅不來梅，有力贏番一場，讓一球捧上盤。

（TVB 01周三凌晨2時直播）

慕遜加柏喺舒拔上任後大幅進步，德甲10戰8勝2和成為最弗球隊，不過上輪聯賽畀利華古遜嘅傑斯寧同查維亞靴南迪斯合力打爆，一盆冷水照頭淋，原來會方同球迷已經準備好連串聖誕聯歡，但佢哋都決定擱置，一心踢好今年最後兩場主場賽事，上仗對利華養傷嘅弗爆中場法比安莊臣有望復出，有決心以一場勝仗撫慰主場球迷。
不來梅護級大過天

雲達不來梅近期每戰必拚，但質素所限，近4場聯賽只得兩分，上仗喺大部分時間領先下被科隆逼和，現時仲排緊聯賽尾5，有護級壓力，球隊賽後都已將目標鎖定喺嚟緊周末對法蘭克福嘅首循環煞科戰，對今場盃賽冇乜奢望，戰意唔及慕遜加柏。