三箭砌河床不落下風

猪拉多纳

主力抖夠博呢場

今晚世冠盃爆發首場4強戰，由東道主廣島三箭喺大阪長居陸上競賽場火併南美盟主河床，爭入決賽。河床雖然實力較高，但已經逾半個月未有正式比賽，狀態成疑，相反三箭踢得勁密下作出適當輪換，喺頭兩仗世冠賽事贏晒兼冇失波，佐藤壽人、戴恩費斯杜格拉斯等主力叉足電可盡情搏殺，加上南美球隊近5屆準決賽，有3次未能喺法定時間贏波，三箭仲有得受讓半一，呢個下盤咪錯過。

（有線61及201台周三晚6時30分直播）

貴為阿根廷老牌勁旅，河床喺2014及15年連奪南美球會盃同南美自由盃，教頭加拿度更係昔日阿根廷國腳，雖然大家熟悉嘅沙維奧拿、路爾斯干沙利斯已淪為後備，但雲基安尼、洛迪高莫拿、艾拿利奧等亦唔嘢小。
河床久疏戰陣未谷起

不過河床最大問題，係之前為咗衞冕南球盃，喺季尾聯賽留晒力hea住嚟，而且自上月尾喺南球盃4強被颶風隊淘汰後，已經有超過半個月冇正式比賽，hea得太耐積埋積埋，要及時操番弗狀態並非易事。

同河床相反，三箭踢得勁密，月頭先同大阪飛腳激鬥兩回合勇奪日職總冠軍，抖咗5日就要出戰世冠，好彩教頭森保一採取適當嘅輪換，先喺資格賽以2比0輕取奧克蘭收起佐藤壽人、米傑治等主力，戴恩費斯杜格拉斯只係後備入替，上仗大勝馬贊比3比0，佢哋即打番正選，體力同狀態都有保證。查實近年南美代表出戰世冠盃表現一般，睇番對上5屆準決賽，有3次喺法定時間內未能贏波，以三箭近兩仗全勝兼冇失波嘅托弗狀態，喺法定時間贏埋唔奇，仲有得受讓半一咁筍，趁早買定下盤。
CF阿美利加贏「比」你睇

至於下午開波嘅第5名名次賽，由中北美洲代表CF阿美利加火併非洲盟主馬贊比。CF阿美利加雖有中場艾拔圖加西亞及查維亞古美斯因傷缺陣，但射手奧利比柏拉達狀態唔錯，上仗對FC廣州更先開紀錄，最終輸波亦雖敗不辱，相反馬贊比上仗狂吞三箭3蛋，眾將各自為戰踢到一盤散沙，難敵整體戰出色嘅CF阿美利加，就算讓球盤要讓一球都冇有怕，照捧CF阿美利加上盤。

（有線61及201台周三晚3時30分直播）