祖雲達斯打吡戰冇甩「拖」

猪拉多纳

祖雲達斯喺意大利盃16強主場對拖連奴，讓半一值得支持，因為上季意甲最佳選舉結果近日揭曉，一如所料「斑馬兵團」攞晒所有大獎，撞啱近排強勢反彈，相信唔會突然失威，既然拖連奴喺「都靈打吡戰」輸到慣，博唔過囉。

（開賽時間：周四凌晨3:45）
拖連奴作客對賽5連敗

由於「斑馬兵團」喺歐聯16強抽中對拜仁慕尼黑，完全冇晉級把握，相信高層都會明白，意甲同意大利盃係佢哋必爭嘅錦標，何況佢哋日前以3:1打沉費倫天拿後，近7場錄得6勝1負，你話點可以唔捧？話晒祖記喺上季意甲最佳選舉，拎晒啲大獎嘛！

事實上，除咗已離隊嘅泰維斯當選最佳球員，祖記仲拎埋最佳球隊同最佳教練兩個大獎，同時有6個球員入選最佳陣容，呢個時候失威都好掃興啫。仲有喎，拖連奴近5次作客祖記全敗，期間有3次冇波入，擺到明喺打吡戰被食住，好難爆得出。