借題發揮：金盃話題多劇味十足 「摩法幻影」鬥三好

纯情小彩迷

　　今日重頭戲香港金盃，呢場係三冠大賽次關，而今屆繼續唔可能會有三冠王出現，因頭關嘅「友誼至上」冇份跑。至於講到呢場賽事，其實都有唔少talking point，剩係講隻「好爸爸」已經講幾百字啦，先嚟季初無聲無息轉倉，跟住創歷史三奪一哩錦標，繼而騎練上演一幕相嗌唔好口，劇情發展落去係換人兼加程，單睇「阿爸」今季嘅演進，直情好睇過阿凡達，係獨欠3D眼鏡之嘛！？

　　而劇集有劉三好（說好話、做好事、存好心）.......其實，亨利覺得係食得好、着得好、住得好至啱！講番正題，金盃亦有三匹「好」，「自由好」夠堅，之前1600米都幾乎追到，2000米會仲啱發揮。「好日子」就夠銳，一連四場冇跌出前四名，仲要帶挈埋韋達都贏到級際賽嗰度緊要嘛！而「好先生」則夠穩，喺嚟香港前後，係得國際賽跑到錯晒嗰場冇前四名之嘛，上場又駁番纜嘞！所以呢三匹「好」，是但一隻或多過一隻入到三甲，真係唔奇噃。

冇理由唔吼２．３

　　另外，要講嘅梗係唔少得「摩法幻影」，大摩出3 隻，「閒話一句」、「爆冷」及「步步穩」，邊隻係主力呢？相信除咗阿摩，冇邊個可一口咬定主帥嗰隻「阿閒」係主力，亨利剩係知道呢幾屆大摩在金盃好犀利，對上4 屆贏咗3 屆，「風雲小子」和「爆冷」（冧莊），07年失落嗰屆都有Q。

　　wow ！揸住咁強嘅數據，咪理佢邊隻係主力，擸咗佢一對高分馬應該錯不到哪裡（近屆經常有２、３號跑入頭二名）！

亨利