斟比爾沙執教史雲斯落力扑錘

猪拉多纳

另一場英超史雲斯主場對韋斯咸，「天鵝」史雲斯早前炒咗領隊蒙克後，今仗續由看守主帥阿倫居迪斯領軍，會方好可能會邀請阿根廷名帥比爾沙執教，對軍心起正面作用。韋斯咸傷兵滿營，近6場聯賽不勝無力發圍，捧史雲斯主勝。

（now 621周一凌晨零時直播）

史雲斯上仗「無帥」狀態下對曼城，表現並唔失禮，僅於補時失守輸1比2，比較可惜，亦反映解僱蒙克對球隊影響唔大。球會近期積極物色新帥，依家最大機會搵比爾沙領軍。呢位綽號「瘋子」嘅名帥，曾執教阿根廷、智利、畢爾包及馬賽等球隊，教波充滿激情兼有感染力，如果來投，相信可改善球隊成績。球員期待緊名帥加盟，有番希望，今仗應會更落力比賽。
韋斯咸殘陣難翻身

「錘仔」韋斯咸自10月尾開始跌Watt，近6場4和2負，連續兩場冇波入，好大程度因傷兵太多，後衞雲斯頓列特、中場皮耶、前鋒迪亞法沙高、安拿華倫西亞及域陀摩西斯都受傷缺陣，今場恐怕難以翻身。