曼城搶韁可秤仙

猪拉多纳

「鐵血中場」耶耶一個掃晒

本周英超壓軸戲上演深宵大戰，由阿仙奴主場火併曼城。雖然兵工廠近況回勇，但佢哋欠缺鐵血防中做掃蕩，面對曼城悍將耶耶托尼相當輸蝕，而且近6次聯賽交手，曼城只曾1敗，兼且有5仗錄得半場勝，初段特別搶韁專做急先鋒，加上王牌阿古路傷愈可候命，今仗有力全身而退，曼城讓球客勝同半場勝可以兼投。

(now 621周二凌晨4時直播)
防中全受傷 阿仙奴蝕章

阿仙奴近5仗不敗之餘仲贏咗4仗，包括歐聯連贏薩格勒布戴拿模及奧林比亞高斯，死裏逃生殺入16強，球隊上下士氣大振，箭頭基奧特近3仗轟4粒，真係弗到冇朋友。不過阿仙奴打硬仗始終差啲，雖然今季聯賽曾擊敗曼聯，但面對熱刺、車路士、利物浦等皆失分而回，總係欠缺一種王者霸氣。而且陣中嘅阿迪達、辛迪卡索拉及高基連等防中全部受傷，今仗肯定倦勤，對防守體系影響極大。尤其係冇咗高基連，上季阿仙奴作客能擊敗曼城，呢位法國悍將於中後場大範圍嘅掃蕩，成為贏波關鍵，更令佢一戰成名。依家阿仙奴只得法明尼同艾朗藍斯可擔任重任，但前者已經走下坡，藍斯屬「Box to Box」不擅防守，喺面對強敵嗰陣，陣中缺少一名鐵血防中助陣相當蝕章。

反觀阿仙奴嘅弱點就正係曼城嘅強項，佢哋坐擁全能戰士耶耶托尼，唔單止喺防線前築起一道牆，呢位科特迪瓦防中後上入楔亦有一手，上仗完場前就係靠佢忽然殺上遠射，省中隊友伊恩拿祖先至絕殺史雲斯，進可攻退可守之餘，並為球隊在逆境下注入永不放棄嘅爭勝欲望。
阿古路候命 吼埋半場勝

另外，曼城主帥比歷連尼表示，自11月尾養傷嘅王牌射手阿古路已經好番，雖然未必一定擔正，但今仗至少能在後備席上候命，對於「藍月亮」嚟講可謂天大喜訊。翻查雙方近6仗聯賽交手，曼城錄得2勝3和1負略佔上風，而且不敗嗰5仗，全部都開出半場勝，證明曼城每逢出戰阿仙奴都會佔到先機，況且阿仙奴主力阿歷斯山齊士亦未知能否趕及傷愈復出，「藍月亮」應可頂住唔輸，受讓必捧讓球客勝，另亦不妨吼埋佢哋半場客勝。