曼聯讓波篤定中伏

猪拉多纳

尹戈爾不去 魔力難覺醒

英超聖誕快車第二站拆禮物日，球迷都好關心曼聯領隊尹戈爾能否令到曼聯「魔力覺醒」，結束近6場不勝嘅頹勢，定係再輸兼收大信封呢？今晚英超早場紅魔將作客史篤城，佢哋依家嘅情況就好似較早前嘅車路士咁，更衣室已經失控，一眾「魔兵」都對尹帥非常反感，為踢走呢位荷蘭教頭，隨時放軟手腳，作客讓波好易中伏，捧史篤城讓球主勝！

（now 621周六晚8時45分直播）
銷假逼加操 再犯眾憎

今個聖誕快車係尹戈爾最後救贖機會，因此呢位「鐵帥」下令取消球會傳統聖誕派對之餘，更取消埋聖誕當日嘅假期，朝早要球員加操，夜晚班球員又冇得留喺屋企同家人共聚，要提早下午到酒店集合專心備戰。假都冇得放真係好過分，尹戈爾咁做再犯眾憎，科娜都係打工仔，當然最明白一眾「魔兵」有幾不滿，試問佢哋又點會肯為尹帥賣命呀！

雖然隊長朗尼口口聲聲話球員都支持尹戈爾，但佢哋喺場上嘅表現係冇得呃人嘅，個別球員直頭唔多願跑，如果唔係就唔會近3場全敗啦！有傳西班牙幫成員桑馬達、安達靴里拉同迪基亞等都唔妥尹帥，依家難得有機會踢走呢條麻煩友，佢哋唔介意Hea多一場送尹帥一程，情況就好似車仔球員早前對李斯特城放軟手腳咁，因此曼迷想見到愛隊「魔力覺醒」贏番場，可能要再等吓添嘞！
史篤城硬淨 正宗豬頭骨

排第11嘅史篤城今季表現中規中舉，但名牌球隊對住呢隊豬頭骨都係失分居多，曼城、車路士同熱刺都中過招，其中史篤城喺聯賽主場更試過連贏車路士同曼城，所有賽事連續6場不勝嘅曼聯今場真係唔輸都願啦，仲旨意佢哋會贏到？雖然話「紅魔鬼」近5季嘅拆禮物日都贏波，不過球隊呢排已經畀尹戈爾狂破羞家紀錄，今晚再失分機會極大，咁嘅形勢下仲要讓波就梗係捧讓球主勝！