些路迪上盤 歎赫斯私房菜

猪拉多纳

聖誕快車並唔係英超嘅專利，查實蘇超都會玩埋一份，今晚場獨腳戲由些路迪造訪赫斯。些路迪向來當赫斯主場係自己屋企，任食任拎一啲都唔客氣，更何況佢哋家陣被爭冠對手鴨巴甸步步進逼，為保榜首位置今仗實行搏埋條命，就算佢哋讓到一球都冇有怕，1.85倍上盤咪走寶。

（TVB302周日晚10:00直播）
為保榜首唔搏唔得

些路迪近年喺蘇超一家獨大，季尾閒閒哋都拋開次席超過10分輕鬆奪冠，點知佢哋今季搞到幾狼狽吓，被鴨巴甸窮追不捨，喺未計周六晚賽事，只係Head住1分咁大把。呢班波上輪聯賽主場1:2輸畀馬瑟韋爾後，爭標一事再現危機，球迷梗係唔肯收貨啦，今鋪一定會打醒12分精神，唔會再大意失分啫。
近6次作客交手全勝

好在對手赫斯對親些路迪都唔識還手咁滯，佢哋連續6次主場迎戰呢支蘇超班霸，通通輸波收場，其中5次更至少輸多過1球，擺明就冇還擊之力。再講吖，赫斯近況轉差連續4場不勝，最近2場比賽更加係破關乏力。頹到咁，就算前鋒艾哈斯拿奧爾、中場占美獲加復操，可以出嚟幫手，但狀態都唔似會弗得去邊，赫斯想喺些路迪身上搶分？難啲喎。