車仔驅魔送尹帥落鑊

猪拉多纳

英超聖誕快車來到第三站，大部分喺前晚Boxing Day比賽完嘅球隊再度登場，焦點落喺曼聯主場對車路士。紅魔鬼上場輸畀史篤城後於各項賽事已七場不勝，領隊尹戈爾被炒相信只係時間問題。車仔現時聯賽排名仲低過紅魔，不過佢哋炒咗莫連奴後精神面貌明顯有改善，而且車仔近八次對紅魔未輸過，平手盤捧有1.93倍嘅車仔！

（now 621周二凌晨1時30分直播）

曼聯、車路士今季可以講係同病相憐，曼聯雖然一度迫近榜首，但尹戈爾嘅「悶蛋足球」一直成為外界詬病，隨住佢哋本月初喺歐聯不敵禾夫斯堡被淘汰出局，攻力不濟、將帥不和等問題開始浮面，曼聯上仗作客淨吞史篤城兩蛋，自1961年以來首次四連敗，亦係1990年以來首次連續七場未能贏波，對自視為英超史上最佳球會嘅曼聯嚟講絕對係大災難！

英國傳媒早前廣泛報道，如果曼聯對史篤城或車路士輸掉其中一場，尹戈爾好大機會即時落鑊，雖然直至昨晚截稿為止未有最新進展，但連尹戈爾上仗賽後都罕有地認衰，便知尹帥已經技窮。依家曼聯面對嘅問題已經唔係球員狀態或者戰術發揮，球員同尹戈爾之間有冇心病亦對演出好大影響，喺咁多不明朗因素之下，想曼聯突然回勇似乎唔多樂觀。

喺波童眼中，曼聯如想挽救今個球季，唯一方法就係炒掉尹戈爾，呢方面真係不妨參考一下今場對手車路士。車仔今季聯賽長期處於榜下游，炒咗莫連奴之後，球隊兩場聯賽取得一勝一和，表現明顯有進步。前晚荷蘭主帥希丁克首次正式督師喺主場雖被屈福特逼和二比二，但若非奧斯卡杜斯山度士射失十二碼，車仔大有機會全取三分。前鋒迪亞高哥斯達累積五張黃牌今仗停賽，不過車仔近八次對住曼聯四勝四和未輸過，依家紅魔千瘡百孔，車仔絕對有力踩多腳，平手盤必捧車仔。